Ispaniya va O‘zbekiston bahor mavsumida to‘g‘ridan-to‘g‘ri aviaqatnovlarni tiklamoqda
"Ávoris" guruhiga kiruvchi mashhur "Travelplan" turoperatori joriy yilning bahorida Ispaniya va O‘zbekiston o‘rtasida sayyohlik reyslarini tikladi, deb xabar bermoqda "Dunyo" AA Ispaniyaning "Expreso" ixtisoslashtirilgan portaliga tayanib.
Kompaniya yana to‘g‘ridan-to‘g‘ri parvozlarni taklif etib, ushbu yo‘nalishdagi yagona operator sifatidagi mavqeini mustahkamlamoqda.
Parvoz dasturi 31-mart kuni boshlangan bo‘lib, Toshkentga kelish va Urganchdan qaytish yoki teskari yo‘nalishda maxsus reyslar asosida amalga oshirilmoqda. Bunday marshrut sxemasi qulayroq logistikani ta’minlaydi, mamlakat bo‘ylab sayohat qilish imkoniyatlarini kengaytiradi va sayohatni yanada mazmunli qiladi.
Dastur uyushgan guruhlarga mo‘ljallangan bo‘lib, O‘zbekistonning asosiy sayyohlik markazlarini qamrab oluvchi batafsil ishlab chiqilgan yo‘nalishlarni o‘z ichiga oladi. Yo‘nalishlar orasida muhim madaniy meros obyektlari va Ipak yo‘lining ramzlari hisoblangan Toshkent, Samarqand, Buxoro va Xiva shaharlari bor.
Turlar narxiga butun sayohat davomida ovqatlanish ham kiritilgan bo‘lib, bu sayohatning qulay formatini ta’minlaydi.
Guruhlarni kuzatib borishga alohida e’tibor beriladi. Sayyohlar ispan tilini biladigan va mamlakat haqida chuqur bilimga ega bo‘lgan professional gidlar bilan sayohat qilishadi. Ular butun marshrut davomida guruhlarga hamrohlik qilib, tarixiy kontekst va axborot yordamini ta’minlaydilar.
Dastur nafaqat Madriddan, balki Ispaniyaning bir qator mintaqaviy aeroportlaridan ham parvozlarni o‘z ichiga oladi, bu esa mamlakatning turli hududlaridan kelgan sayyohlar uchun yo‘nalish imkoniyatlarini kengaytiradi. 12-aprel kuni Santyago-de-Komposteladan "Airbus A330" samolyotida rejalashtirilgan reyslardan biri to‘liq band edi - bortda 388 nafar yo‘lovchi bo‘lib, ular uyushgan sayyohlik guruhlariga birlashtirilgan edi.
"Travelplan" turoperatori brend menejeri Pura Sevilya:
- Ushbu dasturning qayta tiklanishi O‘zbekistonga bo‘lgan barqaror va o‘sib borayotgan talabga javob beradi - bu madaniy jihatdan noyob yo‘nalish bo‘lib, ispan sayyohlari uni tobora ko‘proq qadrlamoqda, ayniqsa to‘g‘ridan-to‘g‘ri reyslar va puxta o‘ylangan sayyohlik mahsuloti mavjudligi bilan.
Bahorgi mavsum doirasida aprel-may oylarida Ispaniyaning Madrid, Sevilya va Saragos shaharlaridan yana 5 ta reys rejalashtirilgan.
Dasturning qayta tiklanishi "Travelplan"ning Ispaniya va O‘zbekiston o‘rtasidagi tashkil etilgan turizmning asosiy ishtirokchilaridan biri sifatidagi mavqeini mustahkamlaydi, to‘g‘ridan-to‘g‘ri reyslar, keng qamrovli sayyohlik paketlari va sayohatlarni yuqori darajada tashkil etishni taklif qiladi.
