O‘zbek ansambli Ispaniyada o‘tkaziladigan Xalqaro festivalda mamlakatimizni taqdim etadi
15-22 iyul kunlari Ispaniyaning Estremadura avtonom hamjamiyatida 44-Xalqaro folklor festivali bo‘lib o‘tadi. Unda O‘zbekiston nomidan "Sharq sadolari" ansambli ishtirok etadi.
Madaniy xilma-xillik va xalqlar o‘rtasidagi do‘stlik ramziga aylangan ushbu muhim tadbir dunyoning turli mamlakatlari, jumladan, Tayvan, Irlandiya, Portugaliya, shuningdek, Ispaniyaning turli mintaqalaridan kelgan jamoalarni birlashtiradi.
Bir hafta davomida "Sharq sadolari" folklor ansambli nafaqat mintaqa poytaxti Badaxos shahrida, balki San-Visente-de-Alkantara, Kastyuera, Torreorgas, Fuente-de-Kantos va Valdelakalsadu kabi boshqa aholi punktlarida ham chiqish qiladi.
Festival konsertlar, paradlar, an’anaviy o‘yinlar va mahorat darslarini o‘z ichiga olgan bir qator tadbirlar bilan ochiladi. Xususan, 16 iyul kuni Badaxosdagi San-Fransisko maydonida O‘zbekiston vakillari xalq o‘yinlariga bag‘ishlangan tadbirda ishtirok etadi. 17 iyul kuni "Sharq sadolari" ansambli festivalning barcha ishtirokchilari tarkibida shahar ko‘chalari bo‘ylab rang-barang paradda o‘tadi. 18-iyul kuni Badaxos meriyasidagi tantanali qabul oldidan bosh maydonda qisqa chiqishlar bo‘lib o‘tadi va 19-iyul kuni ishtirokchilar raqs mahorat darsini o‘tkazadilar.
Estremadura festivali har yili keng jamoatchilik va ommaviy axborot vositalarining e’tiborini tortadi. U nafaqat an’anaviy qo‘shiq va raqslarni taqdim etadi, balki mamlakatlar o‘rtasidagi madaniy muloqotni chuqurlashtirishga ham hissa qo‘shadi. Bu yil sakkizta xalqaro va milliy jamoadan iborat 240 ga yaqin san’atkor ishtirok etishi kutilmoqda.
O‘zbek ansamblining ushbu festivaldagi chiqishi o‘zbek madaniy merosining boyligi, noyob musiqa asboblari, an’anaviy liboslar va raqs spektakllarini namoyish etish uchun ajoyib imkoniyatdir. Bu, shuningdek, O‘zbekiston va Ispaniya o‘rtasidagi madaniy aloqalarni mustahkamlaydi, shuningdek, madaniyat va turizm sohasidagi hamkorlikni yanada kengaytirish imkoniyatlarini kengaytiradi.
