O‘zbekiston kirish turizmining o‘sish sur’atlari bo‘yicha jahonning Top-7 mamlakatlari qatoriga kirdi
Birlashgan Millatlar Tashkilotining Butunjahon turizm tashkiloti (UN Tourism) tomonidan 2025-yilning yanvar-sentyabr oylari yakunlariga ko‘ra, O‘zbekiston xorijiy sayyohlarni jalb qilish bo‘yicha eng yuqori o‘sish sur’atlariga ega bo‘lgan dunyoning Top-7 mamlakati qatoriga kiritildi.
Xususan, O‘zbekistonga tashrif buyurgan xalqaro sayyohlar oqimi 2019-yil darajasiga nisbatan 73 foizga oshgani mamlakatimizning global turizm makonidagi o‘rni izchil mustahkamlanib borayotganidan dalolat beradi.
Ushbu ko‘rsatkichlar O‘zbekistonning Yevropa mintaqasidagi turistik salohiyatiga berilgan yuqori bahoning tasdig‘i ham bo‘ldi. BMTning turizm bo‘yicha reytingiga ko‘ra, 2019-yilga nisbatan sayyohlar sonining o‘sish sur’atlari bo‘yicha respublika Yevropa mintaqasi mamlakatlari orasida 2-o‘rinni egalladi. 2025-yilning dastlabki to‘qqiz oyida mamlakatga kelgan xorijiy sayyohlar soni 2024-yilning shu davriga nisbatan 13 foizga oshib, O‘zbekiston Yevropa mintaqasining eng yuqori o‘sish sur’atlari bilan eng yaxshi to‘rtta sayyohlik yo‘nalishidan biriga aylandi.
BMTning turizm bo‘yicha hisobotida qayd etilishicha, 2025-yilning yanvar-sentyabr oylarida dunyoda xalqaro sayohatlar hajmi o‘rtacha 5 foizga oshdi, bu global turizmning pandemiyadan keyin barqaror tiklanish bosqichiga kirganini ko‘rsatadi. Shu nuqtayi nazardan, O‘zbekiston erishgan natijalar mamlakatda turizm sohasida olib borilayotgan uzoq muddatli va izchil davlat siyosatining samaradorligini ko‘rsatadi.
2025-yilda O‘zbekiston o‘z rekordlarini yangiladi: dastlabki 11 oyda mamlakatga 10,7 milliondan ortiq xorijiy sayyoh tashrif buyurdi, aprel oyidan boshlab esa oylik sayyohlar oqimi tarixda birinchi marta bir milliondan oshdi. Turizm xizmatlari eksportidan tushgan daromad 4,4 milliard AQSH dollaridan oshdi, bu sohaning ilg‘or o‘sish sur’atlarini aks ettiradi.
Sayyohlar oqimining o‘sishi viza rejimining soddalashtirilishi, transport qulayligining oshishi va faol xalqaro marketing siyosati bilan bog‘liq. Shu bilan birga, mehmonxonalar, sayyohlik kompaniyalari va soha mutaxassislari soni ko‘paydi, bu esa infratuzilmani mustahkamlash va O‘zbekistonning jahon turizm bozoridagi raqobatbardoshligini oshirishga xizmat qilmoqda.
An’anaviy tarixiy markazlar - Samarqand, Buxoro va Xiva bilan bir qatorda ekologik va gastronomik turizm tobora ommalashib bormoqda. Uzoq xorijdan kelayotgan sayyohlar sonining ko‘payishi O‘zbekistonning mintaqaviy yo‘nalish doirasidan chiqib, jahon sayyohlik makonida barqaror o‘rin egallayotganidan dalolat beradi.
