O‘zbekiston Paralimpiya terma jamoasi tarixdagi eng yaxshi natijasini qayd etdi

28-avgustdan 8-sentabrga qadar butun dunyoning diqqat markazida bo'lgan "Parij-2024" XVII yozgi Paralimpiya o'yinlari nihoyasiga yetdi, deb xabar bermoqda "Dunyo" AA.

Milliy Paralimpiya qo'mitasining telegram kanali ma'lumotiga ko'ra, dunyoning 168 ta mamlakatidan tashrif buyurgan eng kuchli para atletlar ishtirok etgan ushbu o'yinlarda O'zbekiston delegatsiyasi o'z tarixidagi eng yaxshi natijani qayd etishga erishdi. Matonatli sportchilarimiz murosasiz bellashuvlarda 10 ta oltin, 9 ta kumush va 7 ta bronza, jami 26 ta medal qo'lga kiritib, Yangi O'zbekistonning haqiqiy qahramonlariga aylanishdi.

Ushbu natija bilan delegatsiyamiz Paralimpiya o'yinlarini 168 ta mamlakat orasida 13-o'rinda yakunladi. Shuningdek, Osiyoda uchinchi, MDH, Markaziy Osiyo mintaqasi, Islom birdamligi va Turkiy davlatlar tashkilotiga a'zo mamlakatlar orasida birinchi o'rinni egalladi.